2026 ගෝලීය සාම දර්ශ­කයට අනුව කැපී­ පෙ­නෙන ප්‍රග­ති­යක් අත්කර ගනි­මින් ස්ථාන 14කින් ඉදි­රි­යට පැමි­ණී­මට ශ්‍රී ලංකාව සමත්ව තිබේ. ඕස්ට්‍රේ­ලි­යාවේ සිඩ්නි නුවර කේන්ද්‍ර කර­ගත් ආර්ථික විද්‍යාව හා සාමය පිළි­බඳ ජාත්‍ය­න්තර ආය­ත­නය (Institute for Economics & Peace – IEP) විසින් සකස් කරන ලද 20 වැනි ගෝලීය සාම දර්ශ­කය (Global Peace Index 2026) නිල වශ­යෙන් ප්‍රකා­ශ­යට පත්කර ඇති අතර ශ්‍රී ලංකාව එහි ලකුණු 1.91ක් ලබා­ග­නි­මින් 67 වැනි ස්ථානය හිමි­ක­ර­ගෙන ඇත.

ලෝක ජන­ග­හ­න­යෙන් 99.7%ක් ආව­ර­ණය වන පරිදි ස්වාධීන රාජ්‍ය­යන් සහ කලාප 163ක අභ්‍ය­න්තර හා බාහිර ගැටුම්, ආර­ක්ෂාව සහ හමු­දා­ක­ර­ණය ඇතුළු නිර්ණා­යක 23ක් ඔස්සේ මෙම සමී­ක්ෂ­ණය සිදු­කර තිබේ. මෙවර වාර්තා­වට අනුව සමස්ත ලෝක සාම­කා­මී­ත්වය පසු­ගිය වස­රට සාපේ­ක්ෂව 0.7% කින් පහත වැටී ඇති බව ද ලෝක සාමය මෙලෙස අඛ­ණ්ඩව දරුණු ලෙස පල්ලම් බැස ඇත්තේ අඛ­ණ්ඩව 12 වැනි වස­රට බව ද එම වාර්තාව පෙන්වා දෙයි.

වත්මන් ලෝකයේ පව­තින ගැටුම් දෙගු­ණ­ය­කින් ඉහළ ගොස් ඇති අතර දෙවැනි ලෝක යුද්ධ­යෙන් පසු ලෝකය මුහුණ දෙන දරු­ණු­තම අස්ථා­වර වාතා­ව­ර­ණය මෙය බව ද දර්ශ­කය පෙන්වා දෙයි. විශේ­ෂ­යෙන්ම යුක්‍රේන සහ ගාසා තීරයේ පව­තින දරුණු යුද වාතා­ව­ර­ණ­යන් මීට ප්‍රධා­න­තම හේතුව වී තිබේ. මුළු ලෝක­යේම සාම­කා­මී­ත්වය බිඳ­වැ­ටෙ­මින් පව­තින පසු­බි­මක, ශ්‍රී ලංකාව මෙවර ගෝලීය සාම දර්ශ­කය තුළ කැපී­පෙ­නෙන වර්ධ­න­යක් පෙන්නුම් කිරී­මට සමත්ව තිබීම විශේ­ෂ­ත්ව­යකි.

ඒ අනුව, පසු­ගිය වස­රට සාපේ­ක්ෂව ගෝලීය ශ්‍රේණි­ගත කිරීම්හි ස්ථාන රැසක් ඉදි­රි­යට පැමිණ තිබෙන ශ්‍රී ලංකාවේ දේශ­පා­ලන ස්ථාව­ර­ත්වය වර්ධ­නය වීම, අභ්‍ය­න්තර ප්‍රචණ්ඩ ක්‍රියා සහ මහ­ජන උද්ඝෝ­ෂණ අවම වීම මෙන්ම ආර­ක්ෂක අංශ කෙරෙහි පව­තින විශ්වා­සය ඉහළ යෑම මෙලෙස සාම­කාමී රට­වල් ලැයි­ස්තුවේ ඉදි­රි­යට පැමි­ණී­මට ප්‍රධා­න­තම හේතු­සා­ධක වී ඇති බව සඳ­හන් වේ.

මෙවර දර්ශ­ක­යට අනුව ද ලොව වඩාත්ම සාම­කාමී රාජ්‍යය ලෙස ‘අයි­ස්ල­න්තය’ පෙර­මුණ ගෙන සිටින අතර නව­සී­ල­න්තය, ස්විට්ස­ර්ල­න්තය, ස්ලෝවේ­නි­යාව, අය­ර්ල­න්තය, ඔස්ට්‍රි­යාව, පෘතු­ගා­ලය, සිංග­ප්පූ­රුව, ෆින්ල­න්තය, ජපා­නය යන රට­වල් ද ඉදි­රි­යෙන් පසු­වෙයි.

යුදධ­මය හා දේශ­පා­ල­නික අස්ථා­ව­ර­ත්වය හේතු­වෙන් මෙවර ගෝලීය සාම දර්ශ­කයේ පහ­ළින්ම පසු­වන, එනම් ලොව වඩාත්ම සාම­කා­මී­ත්ව­යෙන් අඩුම රාජ්‍ය­යන් බවට පත්ව ඇත්තේ රුසි­යාව, සුඩා­නය, කොංගෝ ප්‍රජා­ත­න්ත්‍ර­වාදී ජන­ර­ජය, යුක්‍රේනය, ඊශ්‍රා­ය­ලය, දකුණු සුඩා­නය, ආෆ්ග­නි­ස්ථා­නය, යේම­නය, සිරි­යාව, මාලි, සෝමා­ලි­යාව යන රට­වල් ය.

ලෝකයේ සාමය බිඳ­වැ­ටී­මට බල­පාන ප්‍රධා­න­තම සාධ­කය ලෙස IEP ආය­ත­නය හඳු­න්වන්නේ සාම්ප්‍ර­දා­යික යුරෝ­පීය බල­ව­තුන්ගේ බලය ගිලිහී යමින්, මධ්‍යම ප්‍රමා­ණයේ කලා­පීය බල­ව­තුන් නැඟී­සි­ටීම හරහා ඇති වන ‘මහා ඛණ්ඩ­නය’ (The Great Fragmentation) නමැති භූ-දේශ­පා­ල­නික වෙන­සයි. 2018 සහ 2025 වස­ර­වල් අතර කාලය තුළ ලොව පුරා ඩ්‍රෝන ප්‍රහාර (Drone attacks) එල්ල වීම සිය­යට 11,500 කින් ඉහළ ගොස් ඇත.

විවිධ සන්නද්ධ කණ්ඩා­යම් 565ක් අවම වශ­යෙන් එක් ඩ්‍රෝන ප්‍රහා­ර­යක් හෝ එල්ල කර තිබේ. එමෙන්ම ඉති­හා­සයේ ප්‍රථම වතා­වට මිනිස් මැදි­හ­ත්වී­ම­කින් තොරව කෘත්‍රිම බුද්ධිය (AI) මඟින් සටන් බිමේ තීන්දු තීරණ ගන්නා මට්ට­මට තාක්ෂ­ණය වර්ධ­නය වී තිබේ.

ලොව පුරා සිදු වන ප්‍රචණ්ඩ ක්‍රියා සහ යුද්ධ හේතු­වෙන් 2025 වස­රේදී පම­ණක් ගෝලීය ආර්ථි­ක­යට සිදුව ඇති සමස්ත පාඩුව අමෙ­රි­කානු ඩොලර් ට්‍රිලි­යන 21.81කි. එය සමස්ත ලෝක දේපළ නිෂ්පා­දි­ත­යෙන් (Global GDP) සිය­යට 10.5 කට සමාන දැවැන්ත අග­යක් බව ද වාර්තා වෙයි.

The post 2026 ගෝලීය සාම දර්ශ­ක­යෙන් ශ්‍රී ලංකාව ස්ථාන 14ක් ඉදි­රි­යට appeared first on Govdoc Blog.

ශ්‍රී ලංකා මහ බැංකුව (CBSL) විසින් නිකුත් කරන ලද නවතම දත්ත වාර්තා පෙන්වා දෙන්නේ 2026 මැයි මාසය අවසානය වන විට මෙරට නිල සංචිත වත්කම්වල කැපී පෙනෙන වර්ධනයක් සිදුව ඇති බවය . ඒ අනුව නිල සංචිත වත්කම් 2026 මැයි මාසයේදී ඩොලර් මිලියන 6,873 ක් දක්වා ඉහළ ගොස් ඇති බව ශ්‍රී ලංකා මහ බැංකුව සඳහන්  කර ඇත.

එහිදී එම දත්තවලට අනුව, 2026 අප්‍රේල් මස අවසානයේ ඇමරිකානු ඩොලර් බිලියන 6.766 ක් ලෙස පැවති ශ්‍රී ලංකාවේ නිල සංචිත වත්කම්, 2026 මැයි මාසය වන විට ඇමරිකානු ඩොලර් බිලියන 6.873 දක්වා 1.6% කින් ඉහළ ගොස් තිබෙන බවට වේ. මෙය පසුගිය මාසය තුළ වාර්තා වූ ඇමරිකානු ඩොලර් මිලියන 107 ක ශුද්ධ වැඩිවීමකි.

මෙම සංචිත ප්‍රමාණය සඳහා චීන මහජන බැංකුවෙන් ලැබුණු විදේශ විනිමය හුවමාරු පහසුකම යටතේ ලැබුණු මුදල් ද ඇතුළත් වන බවයි මහ බැංකුව වැඩිදුරටත් සඳහන් කර සිටියේ.

මෙම වර්ධනය ශ්‍රී ලංකා ආර්ථිකයේ යථා තත්ත්වයට පත්වීම සහ විදේශ විනිමය සංචිත ශක්තිමත් වීම පිළිබඳ ධනාත්මක සංඥාවක් ලෙස ආර්ථික විශ්ලේෂකයන් පෙන්වා දෙයි. ඉදිරියේදී මෙම සංචිත මට්ටම තවදුරටත් පවත්වා ගනිමින් ජාත්‍යන්තර මූල්‍ය බැඳීම් ඉටු කිරීම සහ ආර්ථික ස්ථාවරත්වය තහවුරු කිරීම රජයේ සහ මහ බැංකුවේ අරමුණ වනු ඇත .

The post ශ්‍රී ලංකා ආර්ථිකයේ නිල සංචිත වත්කම් ඉහළ ගොස් ඇත appeared first on Govdoc Blog.

ශ්‍රී ලංකා මාධ්‍ය ක්ෂේත්‍රයේ නියැලී සිටින වෘත්තිකයන් සඳහා ඉහළ ප්‍රමිතීන් හඳුන්වා දීම සහ පවත්වාගෙන යාම අරමුණු කරගනිමින් “ශ්‍රී ලංකා වරලත් මාධ්‍ය වෘත්තිකයන්ගේ ආයතනය” පිහිටුවීමට අදාළ පනත් කෙටුම්පත රජය විසින් ප්‍රකාශයට පත් කර තිබේ .

මෙම පනත් කෙටුම්පත ජූනි මස 05 වැනිදා නිල ගැසට් පත්‍රය මඟින් නිකුත් කර ඇති අතර, එයට අනුව යෝජිත නීති සම්පාදනය මඟින් අදාළ ආයතනය සංස්ථාපිත මණ්ඩලයක් ලෙස ස්ථාපිත කිරීමට නියමිතව ඇති අතර, මාධ්‍ය ක්ෂේත්‍රයේ සාමාජිකත්වය නියාමනය කිරීම, පුහුණු වැඩසටහන් පැවැත්වීම, විභාග පැවැත්වීම සහ වෘත්තීය ප්‍රමිතීන් ඉහළ නැංවීම සඳහා වන පූර්ණ බලතල මෙම ආයතනය සතු වන බව දැක්වේ.

මෙම පනත් කෙටුම්පතට අනුව යෝජිත ආයතනයේ ප්‍රධානතම අරමුණු ලෙස සුදුසුකම් ලත් මාධ්‍ය වෘත්තිකයන් ආයතනය වෙත බඳවා ගැනීම, ඔවුන්ගේ කුසලතා සහ පුහුණුවීම් තවදුරටත් වර්ධනය කිරීම, මාධ්‍ය ක්ෂේත්‍රය සම්බන්ධයෙන් පර්යේෂණ සිදු කිරීම, විශේෂ ආචාර ධර්ම පද්ධතියක් මඟින් වෘත්තීය විනය පවත්වාගෙන යාම මෙන්ම දේශීය හා ජාත්‍යන්තර මාධ්‍ය ආයතන සමඟ සහයෝගීතාව ප්‍රවර්ධනය කිරීම ඇතුළත් විය .

ආයතනයේ පරිපාලන කටයුතු මාධ්‍ය ක්ෂේත්‍රයේ තේරී පත්වූ සහ පත් කරන ලද සාමාජිකයන්ගෙන් සැදුම්ලත් ‘පාලන සභාවක්’ (Governing Council) මඟින් මෙහෙයවනු ලබන අතර, එවැනි ස්ථිර පාලන සභාවක් පිහිටුවන තෙක් ආයතනයේ ආරම්භක කටයුතු අධීක්ෂණය කිරීම සඳහා විෂය භාර අමාත්‍යවරයා විසින් පත් කරනු ලබන ‘අතුරු පාලන සභාවක්’ (Interim Council) ක්‍රියාත්මක වීමට නියමිතව ඇත .

මෙම පනත් කෙටුම්පත මඟින් මාධ්‍ය වෘත්තිකයන් යන නිර්වචනයට පුළුල් පරාසයක පිරිසක් ඇතුළත් කර තිබෙන අතර, එහිදී මාධ්‍යවේදීන්, සංස්කාරකවරුන්, ප්‍රකාශකයන්, විකාශකයන්, පුවත් ඉදිරිපත් කරන්නන් (Anchors/Presenters), මාධ්‍ය ආයතන හිමිකරුවන්, මාධ්‍ය කළමනාකරුවන්, මාධ්‍ය අධ්‍යාපනඥයින්, පර්යේෂකයන්, තාක්ෂණික ශිල්පීන්, අන්තර්ගත නිර්මාණකරුවන් (Content Creators), අන්තර්ගත සංස්කාරකවරුන්, කැමරා ශිල්පීන් සහ ඡායාරූප ශිල්පීන් ඇතුළු විශාල පිරිසක් මෙම නව වෘත්තීය නියාමන ව්‍යුහයට ඇතුළත් වන බව වැඩිදුරටත් සඳහන් වේ.

The post ශ්‍රී ලංකා වරලත් මාධ්‍ය වෘත්තිකයන්ගේ ආයතනය පිහිටුවීමේ පනත් කෙටුම්පත ගැසට් කෙරේ appeared first on Govdoc Blog.

ශ්‍රී ලංකා විභාග දෙපාර්තමේන්තුව විසින් සංවිධානය කරනු ලබන සියලුම නිල විභාග සඳහා අයදුම් කිරීමේදී ජාතික හැඳුනුම්පත් අංකය ඇතුළත් කිරීම මින් ඉදිරියට අනිවාර්ය කර ඇති බව විභාග දෙපාර්තමේන්තුව විශේෂ නිල නිවේදනයක් නිකුත් කරමින් සදහන් කර ඇත. විභාග ක්‍රියාවලියේ විනිවිදභාවය, ආරක්ෂාව සහ විධිමත්භාවය තහවුරු කිරීම සඳහා මෙම නව තීරණය ගෙන ඇති බව විභාග කොමසාරිස් ජනරාල් කාර්යාලය පෙන්වා දෙයි.

විශේෂයෙන්ම එලබෙන 2026 වසරේ දෙසැම්බර් මාසයේදී පැවැත්වීමට නියමිතව ඇති 2026 අ.පො.ස. සාමාන්‍ය පෙළ (සා/පෙළ) විභාගය සදහා පෙනී සිටීමට අපේක්ෂා කරන සියලුම අයදුම්කරුවන්ගේ ජාතික හැඳුනුම්පත් කඩිනමින් සකස් කර ගැනීමට පියවර ගන්නා ලෙස දිවයිනේ සියලුම රජයේ සහ පෞද්ගලික පාසල්වල විදුහල්පතිවරුන් වෙත දැනටමත් චක්‍රලේඛ මගින් උපදෙස් සහ අවශ්‍ය මාර්ගෝපදේශ ලබා දී ඇති බව එම නිවේදනයේ වැඩිදුරටත් සඳහන් වේ.

ඒ අනුව, එම විභාගය සඳහා නිල වශයෙන් අයදුම්පත් කැඳවීම ආරම්භ කිරීමට පෙර තම ජාතික හැඳුනුම්පත් නිසි ලෙස සකස් කර තබා ගැනීම සියලුම පාසල්වල මෙන්ම පෞද්ගලික අයදුම්කරුවන්ගේ ද පරම වගකීමක් බව විභාග දෙපාර්තමේන්තුව අවධාරණය කර ඇත. හැඳුනුම්පත් නොමැතිවීම හේතුවෙන් විභාග අයදුම්පත් ඉදිරිපත් කිරීමේදී සිදු විය හැකි අනවශ්‍ය ප්‍රමාදයන් වළක්වා ගැනීම සඳහා වහාම ක්‍රියාත්මක වන පරිදි පුද්ගලයින් ලියාපදිංචි කිරීමේ දෙපාර්තමේන්තුව හරහා අදාළ ලේඛන සකස් කර ගන්න ලෙස සිසුන්ට සහ දෙමාපියන්ට දැනුම් දෙනු ලැබේ.

The post විභාග සඳහා ජාතික හැඳුනුම්පත අනිවාර්යය බවට ශ්‍රී ලංකා විභාග දෙපාර්තමේන්තුවෙන් නිවේදනයක් appeared first on Govdoc Blog.

කර්මාන්ත හා ව්‍යවසායකත්ව සංවර්ධන අමාත්‍යාංශයේ සහයෝගයෙන් ශ්‍රී ලංකාවේ ඉන්දියානු මහ කොමසාරිස් කාර්යාලය විසින් සංවිධානය කරනු ලබන ශ්‍රී ලාංකික හස්ත කර්මාන්ත ආභරණ නිර්මාණකරුවන් සඳහා ධාරිතා සංවර්ධන පුහුණු වැඩසටහනක් සඳහා අයදුම්පත් දැන් විවෘතයි.මෙම පුහුණු වැඩසටහන 2026 ජූලි 6 සිට ජූලි 23 දක්වා ඉන්දියාවේ ජායිපූර් හි ඉන්දියානු මැණික් හා ස්වර්ණාභරණ ආයතනය (IIGJ) විසින් පවත්වනු ලබන අතර අතින් සාදන ලද ස්වර්ණාභරණ නිර්මාණය පිළිබඳ මූලික දැනුමක් ඇති අභිලාෂකාමී ස්වර්ණාභරණ නිර්මාණකරුවන් ඉලක්ක කර ගෙන ඇත.

වැඩසටහන් විස්තර

• වැඩසටහන: ශ්‍රී ලාංකික හස්ත ආභරණ නිර්මාණ ශිල්පීන් සඳහා ධාරිතා සංවර්ධන වැඩසටහන.
• පාඨමාලා නාමය: පරිගණක ආධාරිත නිර්මාණකරණය (Computer Aided Designing – CAD).
• පුහුණු ආයතනය: ඉන්දියානු මැණික් හා ආභරණ ආයතනය (Indian Institute of Gems & Jewellery – IIGJ), ජයිපූර්.
• කාලසීමාව: දින 18 (දිනකට පැය 6)
• පුහුණු ක්‍රමය: පරිශ්‍රය තුළ පැවැත්වෙන (On-Campus) පුහුණුව (IIGJ, ජයිපූර්, ඉන්දියාව).
• පුහුණු කාලය: 2026 ජූලි 06 සිට 2026 ජූලි 23 දක්වා.

මැණික් හා ස්වර්ණාභරණ කර්මාන්තයට අවශ්‍ය න්‍යායාත්මක දැනුම සහ ප්‍රායෝගික නිපුණතා ශක්තිමත් කිරීම සඳහා මෙම වැඩසටහන සැලසුම් කර ඇත.

The post ශ්‍රී ලාංකික හස්ත කර්මාන්ත ආභරණ නිර්මාණකරුවන් සඳහා ධාරිතා සංවර්ධන පුහුණු වැඩසටහන 2026 appeared first on Govdoc Blog.

විදුලි බලය සැපයීම සම්බන්ධ සියලු සේවාවන්, ඉන්ධන, ඛනිජ තෙල් නිෂ්පාදන, ගෑස් සැපයීම හෝ බෙදාහැරීම, රෝහල්, බෙහෙත් ශාලා, මෙන්ම මගී හෝ භාණ්ඩ ප්‍රවාහනය ආදී සේවා රැසක් අත්‍යවශ්‍ය සේවා ලෙස ප්‍රකාශයට පත් කරමින් අති විශේෂ ගැසට් නිවේදනයක් නිකුත් කර තිබේ.

1979 අංක 61 දරන අත්‍යවශ්‍ය මහජන සේවා පනතේ 2 වගන්තිය ප්‍රකාරව, ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනාධිපති අනුර කුමාර දිසානායක මහතා වෙත පැවරී ඇති බලතල අනුව මෙම අති විශේෂ ගැසට් නිවේදනය නිකුත් කර ඇති බව සඳහන් වේ.

‘දිට්වා’ සුළි කුණාටුව හේතුවෙන් ඇති වූ පසු ආපදා තත්ත්වය සලකා, සාමාන්‍ය ජන ජීවිතය පවත්වාගෙන යාම සඳහා එකී සේවාවන් අත්‍යවශ්‍ය වන බවත්, ඒවාට අවහිරයක් හෝ බාධාවක් විය හැකි බවත් සැලකිල්ලට ගනිමින්, පහත උපලේඛනයේ සඳහන් සේවාවන් අත්‍යවශ්‍ය සේවාවන් බවට මෙම නියමයෙන් ප්‍රකාශයට පත් කර ඇති බවද වැඩිදුරටත් සඳහන් වේ.

The post විදුලිබල ඇතුළු සේවා රැසක් අත්‍යවශ්‍ය සේවා බවට පත් කරමින් ගැසට් නිවේදනයක් නිකුත් කර ඇත appeared first on Govdoc Blog.

මැයි මස පළමු වනදා සිට ක්‍රියාත්මක වන ඩිජිටල් මෝටර් රථ රක්ෂණ කාඩ්පත් නිකුත් කිරීම සම්බන්ධයෙන් පොලිසිය විසින් විශේෂ දැනුම්දීමක් සිදු කර තිබෙනවා.

ශ්‍රී ලංකා රක්ෂණ නියාමන කොමිෂන් සභාව, ශ්‍රී ලංකා රක්ෂණ සංගමය සහ රක්ෂණ කර්මාන්තයේ අනෙකුත් පාර්ශ්වකරුවන් එක්ව ගනු ලැබූ තීරණයකට අනුව, රක්ෂණ ආයතන මඟින් රක්ෂණ සහතික පත්‍ර වෙනුවට මෙම ඩිජිටල් මෝටර් රථ රක්ෂණ කාඩ්පත් හඳුන්වා දී ඇති බවයි නිවේදනයක් නිකුත් කරමින් පොලිසිය සඳහන් කළේ.ඒ අනුව ස්ථාපිත කර ඇති ‘ජාතික රක්ෂණ සත්‍යාපන පද්ධතිය’ හරහා රක්ෂණයේ වලංගුභාවය පරීක්ෂා කළ හැකි අතර, ඒ සඳහා ප්‍රවේශ විය හැකි ක්‍රමවේදයන් පහත පරිදි වේ.

USSD කේතය මඟින්: 

• ඕනෑම ජංගම දුරකථන ජාලයක් හරහා *1338# අමතා, වාහන අංකය හෝ රක්ෂණ සහතික අංකය ඇතුළත් කිරීමෙන් රක්ෂණ ඔප්පුවේ වත්මන් තත්ත්වය ක්ෂණිකව ලබාගත හැකියි.

කෙටි පණිවිඩ (SMS) මඟින්: 

• වාහන අංකය හෝ රක්ෂණ පත්‍ර අංකය කෙටි පණිවිඩයක් ලෙස 1338 අංකය වෙත යොමු කිරීමෙන්, රක්ෂණ ඔප්පුව සක්‍රියව පවතින්නේ ද යන්න පිළිබඳ ක්ෂණික පිළිතුරක් ලබාගත හැකියි.

දුරකථන ඇමතුම් මඟින්: 

• 1338 අංකය අමතා ලැබෙන උපදෙස් අනුව අදාළ රක්ෂණ ආයතනය තෝරා ගැනීමෙන්, එම සමාගමේ පාරිභෝගික සේවා අංශය හරහා රක්ෂණයේ වලංගුභාවය තහවුරු කරගත හැකියි.

පද්ධතියට වාහන අංකය ඇතුළත් කිරීමේදී ඉංග්‍රීසි අකුරු හෝ ඉලක්කම්, කෙටි ඉර සහ ඉලක්කම් හතර (උදා: ABC-1234) ලෙස ඇතුළත් කළ යුතුය. එහිදී අකුරු හෝ ඉලක්කම් අතර අනවශ්‍ය ඉඩ (Space) නොතැබිය යුතු අතර, පැරණි “ශ්‍රී” අංක සහිත වාහන සඳහා එම අක්ෂරය වෙනුවට “SRI” ලෙස ඉංග්‍රීසියෙන් ඇතුළත් කළ යුතු බව ද පොලිසිය අවධාරණය කරයි.

ඉහත ක්‍රම මඟින් මෝටර් රථයක රක්ෂණය පරීක්ෂා කරන අවස්ථාව වන විට වලංගුව පවතින්නේ ද නැද්ද යන්න ක්ෂණිකව දැන ගත හැකි අතර, කෙටි පණිවිඩ සේවාව මඟින් වඩා පහසුවෙන් මෙම තොරතුරු ලබා ගත හැකියි.

වැඩිදුර තොරතුරු පහත නිවේදනයේ දක්වා තිබෙනවා.

The post ඩිජිටල් මෝටර් රථ රක්ෂණ කාඩ්පත ක්‍රියාත්මක වන ආකාරය පිළිබඳ පොලිසියෙන් දැනුම්දීමක් appeared first on Govdoc Blog.

ජංගම දුරකථන අස්ථානගතවීමකදී හෝ සොරකම් කිරීමකදී ගතයුතු ක්‍රියාමාර්ග සම්බන්ධව පොලීසිය විසින් මහජනතාව වෙත දැනුම්දීමක් සිදුකර තිබේ. නිවේදනයක් නිකුත්කරමින් පොලිස් මාධ්‍ය කොට්ඨාසය විසින් මෙම දැනුම්දීම සිදුකර ඇති අතර ජංගම දුරකථන අස්ථානගත වීම, නැතිවීම සහ සොරකම් කිරීමේ සිදුවීම් සම්බන්ධයෙන් දිවයිනේ සෑම පොලිස් ස්ථානයකටම දෛනිකව පැමිණිලි ලැබෙන බව ශ්‍රී ලංකා පොලිසිය පවසා ඇත.

ජංගම දුරකථනයක් වෙනත් පාර්ශවයක අතට පත්වීමෙන් පුද්ගලික තොරතුරු, මූල්‍ය තොරතුරු, ඡායාරූප සහ සංවේදී දත්ත අවභාවිතා කිරීමේ අවදානමක් පවතින බව ද පොලිසිය සඳහන් කර තිබේ. විශේෂයෙන්ම සමාජ විරෝධී සහ නීතිවිරෝධී ක්‍රියාකාරකම් සඳහා අස්ථානගත වූ හෝ සොරකම් කරන ලද ජංගම දුරකථන යොදා ගැනීමේ සිදුවීම් වාර්තා වී ඇති බැවින් ජනතාව වඩාත් සැලකිලිමත් විය යුතු බව ද පොලිසිය අවධාරණය කරයි.

• ජංගම දුරකථනයක් නැතිවූ හෝ සොරකම් වූ අවස්ථාවකදී පළමුව සිම්පත අක්‍රීය කළ යුතු බවත්, ඒ සඳහා අදාල දුරකථන සේවා සපයන ආයතනය සම්බන්ධ කර ගත හැකි බවත් පොලිසිය පෙන්වා දී ඇත.
• එමෙන්ම දුරකථනයේ IMEI අංකය වෙනම සටහන් කර තබා ගැනීම වැදගත් බව ද පොලිසිය පවසා ඇත. එම අංකය ලබා ගැනීම සඳහා *#06# කෙටි යෙදුම භාවිත කළ හැකිය.
• අස්ථානගත වූ හෝ සොරකම් කරන ලද දුරකථන සොයා ගැනීම සඳහා ශ්‍රී ලංකා පොලිසිය හඳුන්වා දී ඇති “I need” මෘදුකාංග පද්ධතිය භාවිත කළ හැකි අතර, ඒ සඳහා ineed.police.lk වෙබ් අඩවිය හරහා පැමිණිලි ඉදිරිපත් කළ හැකි බව ද දැනුම් දී තිබේ.

2024 වසරේදී අස්ථානගත වූ ජංගම දුරකථන 2796 ක් සොයාගෙන හිමිකරුවන්ට භාර දීමටත්, සොරකම් කරන ලද දුරකථන 928 ක් සම්බන්ධයෙන් නීතිය ක්‍රියාත්මක කිරීමටත් හැකි වූ බව පොලිසිය සඳහන් කර ඇත. එමෙන්ම 2025 වසරේදී අස්ථානගත වූ දුරකථන 2355 ක් සොයාගෙන ඇති අතර, සොරකම් කරන ලද දුරකථන 1019 ක් අත්අඩංගුවට ගෙන නීතිය ක්‍රියාත්මක කර තිබේ.

යම් පුද්ගලයෙකු සොරාගත් ජංගම දුරකතනයක් හෝ වෙනත් දේපලක් අඩු මිලට ලබා දීම හේතුවෙන් එය මිලදී ගෙන සොරබඩු ලග තබා ගැනීම මගින් එම පුද්ගලයා වරදකට වරදකරු වන අතර වසර 03 ක කාලයක සිර දඩුවමකට යටත් වනු ඇත. නව ජංගම දුරකතනයක් මිලදී ගැනීමේදී i need system නමැති මෘදුකාංග මගින් Find Genuine Phone යන සංකල්පය හරහා එම ජංගම දුරකථනය සම්බන්දයෙන් පොලිස් ස්ථානයකට පැමිණිල්ලක් ලැබී ඇත්ද, එය සොරකම් කරන ලද ජංගම දුරකතනයක් ද යන්න පිලිබදවත් තොරතුරු පහසුවෙන් සොයා ගැනීමේ හැකියාව ඇත. ඒ අනුව පුද්ගලයන් විසින් ඉදිරියේදී මිලදී ගනු ලබන ජංගම දුරකථන පිලිබදවත්, එම ස්ථාන පිලිබදවත් දැඩි අවදානය යොමු කල යුතු බව පොලිසිය විසින් මහජනතාවට දැනුම් දී ඇත.

තමන්ට අයත් නොවන දේපලක් හමු වූ විට එය ළඟම ඇති පොලිස් ස්ථානයකට භාරදීම ජනතාවගේ වගකීමක් බවත්, එසේ නොකළහොත් දණ්ඩ නීති සංග්‍රහය යටතේ සාපරාධී සාවද්‍ය පරිහරණය යන චෝදනාව යටතේ නීතිමය ක්‍රියාමාර්ග ගැනීමේ හැකියාව පවතින බවත් පොලිසිය වැඩිදුරටත් දැනුම් දී ඇත.

The post ජංගම දුරකථන අස්ථානගතවීමකදී හෝ සොරකම් කිරීමකදී ගතයුතු ක්‍රියාමාර්ග සම්බන්ධව දැනුම්දීමක් සිදුකර ඇත appeared first on Govdoc Blog.

රාජ්‍ය වෙසක් උත්සවයට සමගාමීව “වෙසක් සතිය” නිමිත්තෙන් පාසල්, විද්‍යාපීඨ, පිරිවෙන් හා ගුරු විද්‍යාල පරිශ්‍රයන්හි සංවිධානය කළ යුතු වැඩසටහන් සම්බන්ධයෙන් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් චක්‍රලේඛයක් නිකුත් කර ඇත.

ඒ අනුව, මැයි 26 වන දින සිට ජූනි 02 වන දින දක්වා වූ කාලසීමාව තුළ අධ්‍යාපන ආයතන පරිශ්‍රයන්හි අදාළ වැඩසටහන් සංවිධානය කළ යුතු බවට එම චක්‍රලේඛය මඟින් උපදෙස් දී ඇත.

2026 මැයි මස 30 වැනිදාට යෙදී ඇති වෙසක් පුන් පොහෝ දිනය නිමිත්තෙන්, මෙවර රාජ්‍ය වෙසක් උත්සවය මැයි මස 27 වන දින මාතර, තිහගොඩ මිදෙල්ලවල පුරාණ විහාරස්ථානයේදී පැවැත්වීමට බුද්ධශාසන, ආගමික හා සංස්කෘතික කටයුතු අමාත්‍යාංශය සහ බෞද්ධ කටයුතු පිළිබඳ දෙපාර්තමේන්තුව කටයුතු සූදානම් කර තිබේ.

අදාළ චක්‍රලේඛය පහතින් දැක්වේ.

The post වෙසක් සතිය නිමිත්තෙන් අධ්‍යාපන ආයතනවල පැවැත්විය යුතු වැඩසටහන් පිලිබද චක්‍රලේඛයක් නිකුත් කර ඇත appeared first on Govdoc Blog.

අධ්‍යාපන අමාත්‍යාංශය විසින් පත් කරන ලද අනධ්‍යයන මාණ්ඩලික නිලධාරීන්ගේ 2026 වාර්ෂික ස්ථාන මාරුවීම් සඳහා වන ස්ථාන මාරු නියෝග ලැයිස්තුව (නම් ලැයිස්තුව සහ නිල නිවේදනය) අධ්‍යාපන අමාත්‍යාංශය විසින් නිකුත් කර ඇත.

එම  ස්ථාන මාරුවීම් 2026 අප්‍රේල් 07 වන දින සිට ක්‍රියාත්මක වේ.

• Cook
• Development / Finance / Management Assistant
• Document Assistant (ලේඛන සහකාර)
• Laboratory Aide (රසායනාගාර සහායක)
• Laboratory Assistant (රසායනාගාර සහකාර)
• Library Aide (පුස්තකාල සහායක)
• Plumber (ජල නල විදුලි)
• School Security (පාසල් ආරක්ෂක)
• Service Assistant (කාර්යය සහායක)
• Service Assistant – Sanitary (සේවා සහායක සනීපාරක්ෂක)
• Sports Trainer (ක්‍රීඩා පුහුණුකරු)
• Hostel Warden (ශිෂ්‍ය නිවාසාධිකාරී)
• Hospital Worker (ගිලන්හල් සේවක)
• Technology Faculty Aide (තාක්ෂණ පීඨ සහායක)
• PSC Decisions (රාජ්‍ය සේවා කොමිෂන් සභා තීරණ)

The post අධ්‍යාපන අමාත්‍යාංශයේ අනධ්‍යයන කාර්ය මණ්ඩල ස්ථාන මාරු ලැයිස්තුව (2026) නිකුත් කර ඇත appeared first on Govdoc Blog.

බුද්ධ ශාසන, සංස්කෘතික හා ආගමික කටයුතු අමාත්‍යාංශයේ සංස්කෘතික කටයුතු දෙපාර්තමේන්තුව විසින් නිකුත් කරන ලද 2026 වර්ෂයට අදාල සිංහල සහ දෙමළ අලුත් අවුරුදු (සුබ කාලයන්) නැකත් සීට්ටුව මෙසේය.

• නව සද බැලීම

අභිනව චන්ද්‍ර වර්ෂය සදහා මාර්තු මස 20 වන සිකුරාදා දින ද, අභිනව සුර්ය වර්ෂය සදහා අප්‍රේල් මස 19 වන ඉරිදා දිනද නව සද බැලීම මැනවි යනුවෙන් නැකැත් සිට්ටුවේ සදහන් වේ

• තෙල් වලං ලිප තැබීම

අප්‍රේල් මස 05 වන ඉරිදා දින පුර්වභාග 11.08 ට මෙම චාරිත්‍රය යෙදී ඇත. ඒ අනුව රතු සහ කහ මිශ්‍ර හෝ තඹවන් පැහැයෙන් යුත් වස්ත්‍රාභරණයෙන් සැරසී දකුණු දිශාව බලා ලිප් බැද ගිනි මොලවා තෙල් වලං ලිප තබා අවරුදු කැවිලි වර්ග පිස ගැනීම මැනවි යනුවෙන් නැකත් සිට්ටුවේ සදහන් වේ

• පරණ අවුරුද්ද සදහා ස්නානය

අප්‍රේල් මස 13 වන සදුදා දින දිවුල්පත් යුෂ මිශ්‍ර නානු ගා ස්නානය කර ඉෂ්ට දේවතා අනුස්මරණයෙහි යෙදී වාසය මැනවි යනුවෙන් නැකැත් සිට්ටුවේ සදහන් වේ

• සිංහල දෙමළ අලුත් අවුරුදු උදාව

අප්‍රේල් මස 14 වන අඟහරුවාදා පූර්වභාග 09.32 ට මෙවර සිංහල හා දෙමළ අලුත් අවුරුදු උදාව යෙදී තිබේ.

• පුණ්‍ය කාලය

පුණ්‍ය කාලය යෙදී ඇත්තේ අප්‍රේල් මස 14 වන අඟහරුවාදා පූර්වභාග 03.08 සිට එදින අපර භාග 03.56 දක්වා වේ.

• ආහාර පිසීම

ආහාර පිසීමේ නැකත යෙදී ඇත්තේ, අප්‍රේල් මස 14 වන අඟහරුවාදා පූර්වභාග 10.51 ට වේ. රක්ත වර්ණ වස්ත්‍රාභරණයෙන් සැරසී දකුණු දිසාව බලා, ලිප් බැඳ ගිනි මොළවා කිරිබත්ද කැවිලි වර්ගයක්ද දී කිරි සහ විළඳ ද පිළියෙල  කර ගැනීම සිදුකළ යුතු බව සඳහන් වේ.

• වැඩ ඇල්ලීම, ගනුදෙනු කිරීම සහ ආහාර අනුභවය

වැඩ ඇල්ලීම, ගනුදෙනු කිරීම සහ ආහාර අනුභව නැකත යෙදී ඇත්තේ අප්‍රේල් මස 14 වැනි අඟහරුවාදා අපරභාග 12.06 ට වේ. රක්ත වර්ණ වස්ත්‍රාභාරණයෙන් සැරසී දකුණු දිශාව බලා වැඩ අල්ලා ගනුදෙනු කොට ආහාර අනුභවය සුදුසු බව නැකත් පත්‍රයේ සඳහන් වේ.

• හිසතෙල් ගෑම

හිසතෙල් ගෑමේ නැකත  අප්‍රේල් 15 වන බදාදා පූර්වභාග 6.55ට යෙදී තිබේ.

• හදිසි රාජකාරි සදහා පිටත්ව යාම

අප්‍රේල් මස 17 වන සිකුරාදා දින පුර්වභාග 05.38 ට රන්වන් පැහැ වස්ත්‍රාභරණයෙන් සැරසී දීකිරි මිශ්‍ර කිරිබතක් ද හෙළ මෝරු ද උදු මිශ්‍ර කැවිලි වර්ගයක් ද අනුභව කර උතුරු දිශාව බලා පිටත්ව යනු මැනවි යනුවෙන් නැකත් සිට්ටුවේ සදහන් වේ.

• රැකීරක්ෂා සඳහා පිටත්ව යාම

රැකීරක්ෂා සඳහා පිටත්ව යාමේ නැකත යෙදී ඇත්තේ අප්‍රේල් මස 20 වැනි සඳුදා දින පූර්වභාග 6.27 ට වේ.

• පැල සිටුවීම

අප්‍රේල් මස 23 වන බ්‍රහස්පතින්දා දින පුර්වභාග 09.01 ට රන්වන් පැහැති වස්ත්‍රාභරණයෙන් සැරසී උතුරු දිසාව බලා පැල සිටුවීම මැනවි යනුවෙන් නැකත් සිට්ටුවේ සදහන් වේ.

The post 2026 සිංහල හා දෙමළ අලුත් අවුරුදු නැකත් සීට්ටුව appeared first on Govdoc Blog.

සංචාරක කර්මාන්තයේ ඉන්ධන අවශ්‍යතා වෙනුවෙන් ලියාපදිංචි විය යුතු ආකාරය සම්බන්ධයෙන් විදේශ කටයුතු, විදේශ රැකියා සහ සංචාරක අමාත්‍යාංශය විසින් නිවේදනයක් නිකුත් කර ඇත.

ඒ අනුව, සංචාරක කර්මාන්ත කටයුතු සඳහා අවශ්‍ය ඉන්ධන ලබා ගැනීමට www.tourismfuel.sltda.gov.lk යන සබැඳිය ඔස්සේ තොරතුරු ලබා දෙන ලෙස එම අමාත්‍යාංශය ඉල්ලා සිටී. පෝරමය පිරවීම සඳහා Gmail ගිණුමක් භාවිත කිරීම අනිවාර්ය බව ද සංචාරක අමාත්‍යාංශය වැඩිදුරටත් සඳහන් කර තිබේ.

මෙම නව පියවර මඟින් සංචාරක කර්මාන්තයේ නියුතු හෝටල් හිමියන්, සංචාරක මගපෙන්වන්නන් සහ ප්‍රවාහන සේවා සපයන්නන්ට ඉන්ධන ගැටලුවලින් තොරව සිය සේවාවන් පවත්වාගෙන යාමට අවස්ථාව සැලසේ.

The post සංචාරක කර්මාන්තය සඳහා ඉන්ධන නිකුත් කිරීම පිළිබදව දැනුම් දීමක් appeared first on Govdoc Blog.