මැයි දින සැමරුම සඳහා සූදානම් වීම ඇරඹේ.

මේ වසරේ මැයි 01 වැනිදාට යෙදෙන ජාත්‍යන්තර කම්කරු දිනය සැමරීමට දේශපාලන පක්‍ෂ කිහිපයක්ම සූදානමින් සිටී.

එක්සත් ජාතික පක්ෂ ජන රැළිය ජනාධිපති රනිල් වික්‍රමසිංහ මහතා ඉදිරියේ මාලිගාවත්තේදී පැවැත්වෙන බව එම පක්ෂයේ මහලේකම් පාලිත රංගේ බණ්ඩාර මහතා පවසයි.

සමගි ජන බලවේගයේ මැයි දින රැලි පිටකොටුව චැතම් වීදියේදී සහ තලවාකැලේ යන ස්ථානවල පැවැත්වෙන බව පාර්ලිමේන්තු මන්ත්‍රී තිස්ස අත්තනායක මහතා පවසයි.

ශ්‍රී ලංකා පොදුජන පෙරමුණේ මැයි දින රැලිය මෙවර බොරැල්ල කැම්බල් පිටියේදී පැවැත්වෙන බව පාර්ලිමේන්තු මන්ත්‍රී සංජීව එදිරිමාන්න මහතා පවසයි.

ශ්‍රී ලංකා නිදහස් පක්ෂ මැයි දින රැලිය ගම්පහ නගර සභා පිටියේදී පැවැත්වීමට නියමිතයි.

ගම්පහ ප්‍රදේශයේ පැවැත්වෙන ජන රැළියට පක්ෂයේ සියලුම මන්ත්‍රීවරුන් සහභාගී වීමට නියමිත බව එම පක්ෂයේ ජ්‍යෙෂ්ඨයෙකු පවසයි.

“රට හදන විසඳුමට, ජන බලය එක පෙලට” යන තේමාව යටතේ ජාතික ජන බලවේගයේ මැයි දින රැළි දිවයින පුරා පැවැත්වේ.

කොළඹදී පැවැත්වීමට නියමිත මැයි දින පෙළපාලිය පස්වරු 2.00ට කොළඹ බී.ආර්.සී. පිටියේදී පැවැත්වෙන අතර අනතුරුව පස්වරු 3.00ට සී.ඩබ්ලිව්.ඩබ්ලිව් කන්නන්ගර මාවතේදී රැලිය පැවැත්වේ.

යාපනයේ මැයි දින රැලිය පෙරවරු 10ට යාපනය නන්ද සෙල්වා රඟහලේදී පැවැත්වීමට නියමිතය.

මාතරදී පැවැත්වීමට නියමිත මැයි දින පෙළපාලිය පස්වරු 2 ට රාහුල මංසන්ධියෙන් සහ රැළිය මාතර වෙරළ උද්‍යානයේ දී පස්වරු 3.30 ට පැවැත්වේ.

අනුරාධපුර මැයි දින රැලිය පස්වරු 3.30ට අනුරාධපුර මහජන ක්‍රීඩාංගණයේදී පැවැත්වීමට නියමිතය.