ශ්‍රී ලංකා ආර්ථිකයේ නිල සංචිත වත්කම් ඉහළ ගොස් ඇත

ශ්‍රී ලංකා ආර්ථිකයේ නිල සංචිත වත්කම් ඉහළ ගොස් ඇත

ශ්‍රී ලංකා මහ බැංකුව (CBSL) විසින් නිකුත් කරන ලද නවතම දත්ත වාර්තා පෙන්වා දෙන්නේ 2026 මැයි මාසය අවසානය වන විට මෙරට නිල සංචිත වත්කම්වල කැපී පෙනෙන වර්ධනයක් සිදුව ඇති බවය . ඒ අනුව නිල සංචිත වත්කම් 2026 මැයි මාසයේදී ඩොලර් මිලියන 6,873 ක් දක්වා ඉහළ ගොස් ඇති බව ශ්‍රී ලංකා මහ බැංකුව සඳහන්  කර ඇත.

එහිදී එම දත්තවලට අනුව, 2026 අප්‍රේල් මස අවසානයේ ඇමරිකානු ඩොලර් බිලියන 6.766 ක් ලෙස පැවති ශ්‍රී ලංකාවේ නිල සංචිත වත්කම්, 2026 මැයි මාසය වන විට ඇමරිකානු ඩොලර් බිලියන 6.873 දක්වා 1.6% කින් ඉහළ ගොස් තිබෙන බවට වේ. මෙය පසුගිය මාසය තුළ වාර්තා වූ ඇමරිකානු ඩොලර් මිලියන 107 ක ශුද්ධ වැඩිවීමකි.

මෙම සංචිත ප්‍රමාණය සඳහා චීන මහජන බැංකුවෙන් ලැබුණු විදේශ විනිමය හුවමාරු පහසුකම යටතේ ලැබුණු මුදල් ද ඇතුළත් වන බවයි මහ බැංකුව වැඩිදුරටත් සඳහන් කර සිටියේ.

මෙම වර්ධනය ශ්‍රී ලංකා ආර්ථිකයේ යථා තත්ත්වයට පත්වීම සහ විදේශ විනිමය සංචිත ශක්තිමත් වීම පිළිබඳ ධනාත්මක සංඥාවක් ලෙස ආර්ථික විශ්ලේෂකයන් පෙන්වා දෙයි. ඉදිරියේදී මෙම සංචිත මට්ටම තවදුරටත් පවත්වා ගනිමින් ජාත්‍යන්තර මූල්‍ය බැඳීම් ඉටු කිරීම සහ ආර්ථික ස්ථාවරත්වය තහවුරු කිරීම රජයේ සහ මහ බැංකුවේ අරමුණ වනු ඇත .